წიგნის ანოტაცია
წიგნი მათთვისაა, ვისაც ცხოვრებაში ერთხელ მაინც სჭერია ფოტოაპარატი და კარგი კადრის გადაღება უცდია, ვისთვისაც ფოტოგრაფია ჰობია, ვინც პროფესიონალი ფოტოგრაფი, ფოტორეპორტიორი, ფოტოდოკუმენტალისტი, რომლისთვისაც ღირებული კადრის მოპოვება სიცოცხლის საპირწონეც შეიძლება იყოს. განსაკუთრებით კი წიგნი მათთვისაა, ვისაც სურს, რაც შეიძლება მეტი იცოდეს არა მხოლოდ ფოტოგრაფიის ისტორიის შესახებ, არამედ იმ დაწერილ თუ ნაგულისხმევ კანონებზე, რომელთა შესისხლხორცება კამერიანი პიროვნებისთვის ბუნებრივი პროცესია; მით უფრო მაშინ, თუ ვიღებთ ადამიანებს და იმ გარემოს, სადაც ისინი ცხოვრობენ, სწავლობენ, აცხადებენ პროტესტს, ისვენებენ, იძლევიან ინტერვიუს, იბრძვიან არსებობისთვის, რგავენ ხეებს, აჩენენ ბავშვებს და სხვა.
წიგნით იმასაც ეზიარებით, თუ რა არის ფოტოაპარატი და რა ტექნიკური „ჯადოქრობის“ დამსახურებით ვიღებთ სურათებს, გაეცნობით ფოტოგრაფიის ყველაზე პოპულარულ მიმართულებებს, ფოტოთხრობასთან დაკავშირებულ სასარგებლო რჩევებს, ღია და ფარული გადაღების ხერხებს; გაიგებთ, სად და რატომ ეზღუდებათ ფოტოგრაფებს მუშაობა, რა არის საავტორო უფლებები, როგორ იღებენ საარჩევნო კამპანიებს და სხვა უამრავ, თქვენთვის გამოსადეგ რამეს.
სწორედ ამით არის ეს წიგნი საინტერესო – ფოტოდოკუმენტალისტიკის სამყაროში მოგზაურობით და „სამოგზაურო“ განმარტებებით, პრაქტიკული რჩევებით ფოტოჟურნალისტებისთვის, ვისაც უშუალო კავშირი აქვს ვიზუალურ კომუნიკაციებთან, საზოგადოების მოლოდინებთან და, მაშასადამე, ცოცხალ ემოციებთან, რომელთა გამოღვიძებაც ამ საუკუნეში საკმაოდ რთულია.
